Book Review: ഫ്രൈഡേ ഫോറെൻസിക് ക്ലബ് (രജത് ആർ)

 ഡോ രജത് ആർ എഴുതി ഇതിനോടകം തന്നെ വായനക്കാരുടെ പ്രിയപ്പെട്ടതായി തീർന്ന പുസ്തകമാണ് ‘ഫ്രൈഡേ ഫോറെൻസിക് ക്ലബ്’ . എഴുത്തുകാരന്റെ ആദ്യ നോവലായ ഒന്നാം ഫോറെൻസിക്ക് അദ്ധ്യായത്തിലെ പ്രധാന കഥാപാത്രമായ ഡോ അരുൺ ബാലൻ ഐ പി എസ് വീണ്ടും വരുന്ന നോവൽ എന്ന വിശേഷണവുമായി എത്തിയ നോവൽ മൂന്ന് ഫോറെൻസിക്ക് കേസ്സുകൾ കൃത്യമായി കോർത്തിണക്കിയ ഒരു 'കേസ് സീരീസ് ' നോവലാണ് .

ഒരുപാട് മെഡിക്കൽ / ടെക്‌നിക്കൽ കാര്യങ്ങൾ കടന്ന് വരുന്നുണ്ടെങ്കിലും അവയെല്ലാം വളരെ ലളിതമായി, മടുപ്പിക്കാത്ത രീതിയിൽ, മികച്ച ഭാഷയിൽ അവതരിപ്പിക്കുവാൻ സാധിച്ചിട്ടുണ്ട് എന്നതാണ് ഈ പുസ്തകത്തിന്റെ ഏറ്റവും വലിയ മേന്മയായി എനിക്ക് തോന്നിയത് . നോവലിൽ കടന്ന് വരുന്ന മൂന്ന് കേസുകളും ആവർത്തന വിരസത തോന്നിക്കാത്തവയാണെന്നതും , കഥകളിലോ നോവലുകളിലോ അധികം കണ്ട് /കേട്ട് ശീലിച്ചിട്ടില്ലാത്ത മെഡിക്കൽ സാങ്കേതികത്വങ്ങൾ കൈകാര്യം ചെയ്യുന്നവയാണെന്നതും പുസ്തകത്തെ ഒരു മികച്ച വായനാനുഭവം ആക്കിത്തീർക്കുന്നുണ്ട് .

X ജംക്ഷൻ , Z ജനറേഷൻ , Y ജീൻ എന്നിങ്ങനെ മൂന്ന് കേസുകളും പിന്നെ പാതിയിൽ പറഞ്ഞവസാനിപ്പിക്കുന്ന ‘നിലാവലി കേസ്’ എന്നിങ്ങനെ നാല് കേസുകളാണ് ഈ നോവലിൽ ഉള്ളത് . (ഫോറെൻസിക്ക് ക്ലബ് എന്ന രചനാ സങ്കേതത്തിലൂടെ ഈ കേസുകളെ കൂട്ടിയിണക്കി നോവലിന്റെ രൂപത്തിലാക്കിയിട്ടുണ്ട് എഴുത്തുകാരൻ ).

ടോക്സിക്കോളജിയിലേയും മോഡേൺ മെഡിസിനിലേയും നിരവധി വിവരങ്ങൾ രചനാ സങ്കേതങ്ങളായി ഉപയോഗിച്ചിട്ടുണ്ടെങ്കിലും നരേറ്റീവ് ആവശ്യപ്പെടുന്ന നാടകീയതയും ,ക്ലിഫ് ഹാങ്ങർ എൻഡിങ്ങുകളും നോവലിൽ ഉൾക്കൊള്ളിച്ചിട്ടുള്ളത് genre ആരാധകരെ തൃപ്തിപ്പെടുത്തും എന്ന് തന്നെയാണ് എനിക്ക് തോന്നിയത് . രണ്ടാം കേസ്സിലെ സ്നേഹയുടെ മരണവുമായി ബന്ധപ്പെട്ടുള്ള ചോദ്യത്തിന് "കാലന്റെ വാഹനത്തിൽ നിന്നുള്ള വിഷം " എന്ന മറുപടി നൽകുന്നതൊക്കെ ഇത്തരത്തിലുള്ള ശ്രമങ്ങളായാണ് തോന്നിയത് .

കൃത്യമായ തുടക്കവും , ഒടുക്കവുമുള്ള ഈ മൂന്ന് കേസ്സുകളിൽ ഏറ്റവും ഫ്രഷ് ആയിട്ടുള്ള ക്ലൈമാക്സ് റിവീൽ ഉള്ളത് ഒരു പക്ഷെ ഒടുവിലെ കഥയായ 'Y' ജീൻ നാവും .ഒരു ആശുപത്രിയുടെ ക്രിട്ടിക്കൽ ഐ സി യൂവിൽ പ്രവേശിപ്പിക്കപ്പെടുന്ന പഴയ കാല സിനിമാ താരത്തിന്റെ ജീവിതത്തിലെ ദുരൂഹതകളിൽ നിന്ന് തുടങ്ങി , disputed paternity സംഘർഷങ്ങളിലൂടെ സഞ്ചരിച്ച് അപ്രതീക്ഷിതമായ ക്ളൈമാക്സിൽ അവസാനിക്കുന്ന ഈ കേസ് തീർച്ചയായും മലയാള കുറ്റാന്വേഷണ നോവൽ ശ്രമങ്ങളിലെ ധീരമായ പരീക്ഷണം തന്നെയാണ് .

ഫോറൻസിക് ക്ലബിന്റെ ആരംഭത്തിൽ പരാമർശിക്കുന്ന നിലാവലി കേസുമായി അരുൺ ബാലൻ തിരിച്ചെത്തും എന്ന് പ്രതീക്ഷിച്ചു കൊണ്ട് ..

-നിഖിലേഷ്‌ മേനോൻ